ജോ ബൈഡന്‍ വിജയത്തിലേക്ക് കുതിക്കുമ്പോള്‍ ഇന്ത്യന്‍ വിപണികളില്‍ മുന്നേറ്റം; രൂപയുടെ മൂല്യം ഉയര്‍ന്നു

5 years ago

മുംബൈ: ഡെമോക്രാറ്റിക് സ്ഥാനാര്‍ത്ഥി ജോ ബൈഡന്‍ വിജയത്തിലേക്ക് അടുക്കുന്നുവെന്ന റിപ്പോര്‍ട്ടുകളും ആഗോള വിപണികളിലെ അനുകൂലമായ സൂചനകളെയും തുടര്‍ന്ന് വ്യാഴാഴ്ച ഇന്ത്യന്‍ വിപണികള്‍ ഒരു ശതമാനത്തിലധികം മുന്നേറ്റം നടത്തി. ഇന്ത്യന്‍ കോര്‍പ്പറേറ്റുകളുടെയും ബാങ്കുകളുടെയും നടപ്പ് സാമ്പത്തിക വര്‍ഷത്തെ രണ്ടാം പാദത്തിലെ മെച്ചപ്പെട്ട പ്രവര്‍ത്തന ഫലങ്ങളും വിപണിയുടെ ആത്മവിശ്വാസം വര്‍ധിപ്പിച്ചിട്ടുണ്ട്.

ബിഎസ്ഇ സെന്‍സെക്‌സ് 41,144 ലെവലില്‍ 500 പോയിന്റ് നേട്ടത്തിലേക്ക് ഉയര്‍ന്നപ്പോള്‍, നിഫ്റ്റി 50 സൂചിക 2020 ഒക്ടോബര്‍ 21 ന് ശേഷം ആദ്യമായി 12,000 മാര്‍ക്കിന് മുകളിലെത്തി. നിഫ്റ്റി 50 സൂചിക 12,050 ലെവലിനു മുകളിലേക്ക് ഉയര്‍ന്നു. ഇത് എട്ട് മാസത്തിനിടയിലെ ഏറ്റവും ഉയര്‍ന്ന വിപണി നിലവാരമാണ്.

വ്യക്തിഗത ഓഹരികളില്‍, നടപ്പ് സാമ്പത്തിക വര്‍ഷത്തെ രണ്ടാം പാദ ഫലങ്ങള്‍ പുറത്തുവന്നതിനെ തുടര്‍ന്ന് എസ്ബിഐ ഓഹരികള്‍ ആറ് ശതമാനത്തിലധികം ഉയര്‍ന്നു. സെന്‍സെക്‌സിലെ നേട്ടക്കാരുടെ പട്ടികയില്‍ ഒന്നാമതെത്താന്‍ എസ്ബിഐയെ ഈ മുന്നേറ്റം സഹായിച്ചു. എച്ച്‌സിഎല്‍ ടെക് (4 ശതമാനം വര്‍ധന), ടെക് മഹീന്ദ്ര, ഇന്‍ഫോസിസ് (രണ്ട് ശതമാനം വീതം ഉയര്‍ന്നു) എന്നിവയും നേട്ടമുണ്ടാക്കി.

നിഫ്റ്റി സെക്ടറല്‍ സൂചികകളെല്ലാം മികച്ച വ്യാപാര നേട്ടത്തിലാണ്. നിഫ്റ്റി പൊതുമേഖല ബാങ്ക് സൂചിക മൂന്ന് ശതമാനം ഉയര്‍ന്നു. വിശാലമായ വിപണികളും ഉയര്‍ന്നു, എസ് ആന്റ് പി ബിഎസ്ഇ മിഡ് ക്യാപ്പ്, സ്‌മോള്‍ക്യാപ്പ് സൂചികകള്‍ 0.8 ശതമാനം നേട്ടത്തിലാണ്. ബെര്‍ജര്‍ പെയിന്റ്‌സ്, ഇമാമി, ഗോഡ്രെജ് കണ്‍സ്യൂമര്‍ പ്രോഡക്ട്‌സ് എന്നിവയുള്‍പ്പെടെ 127 കമ്പനികള്‍ ഇന്ന് രണ്ടാം പാദ പ്രവര്‍ത്തന ഫലം പ്രഖ്യാപിക്കും. ബുധനാഴ്ചത്തെ 74.74 എന്ന ക്ലോസിംഗ് നിരക്കില്‍ നിന്ന് യുഎസ് ഡോളറിനെതിരെ ഇന്ത്യന്‍ രൂപ ഇന്ന് 74.34 എന്ന നിലവാരത്തിലേക്ക് ഉയര്‍ന്നു.

Related Articles