തിരുവനന്തപുരം: മികച്ച നിലയില്‍ പ്രവര്‍ത്തിച്ചിരുന്ന ഒരു കമ്പനി കൂടി കേരളത്തില്‍ അടച്ചുപൂട്ടിയതോടെ 1500 പേര്‍ക്ക് കേരളത്തില്‍ ജോലി നഷ്ടമായി. ഇംഗ്ലീഷ് ഇന്ത്യന്‍ ക്ലേ ലിമിറ്റഡ് കമ്പനിയാണ് കളിമണ്ണ് കിട്ടുന്നതിലെ അപര്യാപ്തതയെ തുടര്‍ന്ന് പ്രവര്‍ത്തനം നിര്‍ത്തിയത്. ഇതോടെ കമ്പനിയിലെ ജീവനക്കാരുടെ സംഘടനകള്‍ സംയുക്തമായി സമരവും ആരംഭിച്ചിരിക്കുകയാണ്.
മൈനിങ് അനുമതിക്കായി 2019 ജൂലൈ 15 ന് സംസ്ഥാന സര്‍ക്കാരിനെ സമീപിച്ചെങ്കിലും ഇക്കാര്യത്തില്‍ ഇതുവരെ തീരുമാനമായിട്ടില്ലെന്ന് കമ്പനിയുടെ ഓപ്പറേഷന്‍സ് വിഭാഗം ഡപ്യൂട്ടി ജനറല്‍ മാനേജര്‍ എസ് മഹേഷ് പറഞ്ഞു. ഇക്കഴിഞ്ഞ ഓഗസ്റ്റ് പത്തോടെയാണ് കേരളത്തില്‍ കൊച്ചുവേളിയിലും തോന്നയ്ക്കലിലും സ്ഥിതി ചെയ്യുന്ന ഫാക്ടറികള്‍ കമ്പനി അടച്ചുപൂട്ടിയത്. രണ്ട് വര്‍ഷമായി കമ്പനി നഷ്ടത്തിലായിരുന്നുവെന്നും കൈയ്യിലുണ്ടായിരുന്ന കളിമണ്ണ് ഉപയോഗിച്ചാണ് പ്രവര്‍ത്തനം തുടര്‍ന്നതെന്നും മഹേഷ് പറഞ്ഞു. എന്നാല്‍ സര്‍ക്കാരില്‍ നിന്ന് അനുമതി ലഭിക്കാതെ വന്നതോടെയാണ് അടച്ചുപൂട്ടേണ്ട സാഹചര്യത്തിലേക്ക് എത്തിയത്.
കമ്പനി കളിമണ്ണ് കുഴിച്ചെടുക്കുകയാണ് ചെയ്യുന്നത്. ഖനനം പൂര്‍ത്തിയായ സ്ഥലങ്ങളെ മഴക്കുഴികളായി മാറ്റിയെടുക്കാറുമുണ്ട്. പള്ളിപ്പുറത്തെ സ്ഥലത്ത് ഖനനം പൂര്‍ത്തിയായ ശേഷമാണ് കമ്പനി ഇവിടെ പ്രവര്‍ത്തനം നിര്‍ത്തിയത്. ഭൂമി പഴയ നിലയിലേക്ക് മാറ്റി. തോന്നയ്ക്കലില്‍ കമ്പനി സ്ഥലത്താണ് ഖനനം നടക്കുന്നതെന്നും അദ്ദേഹം വ്യക്തമാക്കി.
അമ്പത് വര്‍ഷമായി പ്രവര്‍ത്തിക്കുന്ന കമ്പനിയാണ്. ലോക്ക്ഡൗണ്‍ സമയത്ത് പ്രവര്‍ത്തിച്ചിരുന്നില്ലെങ്കിലും ജീവനക്കാര്‍ക്ക് ആനുകൂല്യങ്ങള്‍ നല്‍കിയിരുന്നുവെന്നും എല്ലാല്‍ ശമ്പള പരിഷ്‌കരണവും ആനുകൂല്യങ്ങള്‍ ഉയര്‍ത്തുന്നതും വെല്ലുവിളിയാണെന്നും കമ്പനി പുറത്തിറക്കിയ വാര്‍ത്താക്കുറിപ്പില്‍ പറയുന്നു. ഖനനാനുമതി ലഭിക്കുന്നതിന് മുഖ്യമന്ത്രിക്കും വ്യവസായ വകുപ്പ് മന്ത്രിക്കും നിവേദനം നല്‍കുമെന്നും മാനേജ്‌മെന്റ് അറിയിച്ചു.
