ന്യൂഡല്ഹി: ഗൂഗിളിന്റെ ആന്ഡ്രോയിഡിനും ആപ്പിളിന്റെ ഐഒഎസിനും ബദലായി ഒരു തദ്ദേശീയ ഓപ്പറേറ്റിംഗ് സിസ്റ്റം സൃഷ്ടിക്കാന് ഒരുങ്ങി ഇന്ത്യ. ഇത് സുഗമമാക്കുന്ന ഒരു നയം കൊണ്ടുവരാന് സര്ക്കാര് പദ്ധതിയിടുന്നതായി കേന്ദ്ര ഇലക്ട്രോണിക്സ്, ഐടി സഹമന്ത്രി രാജീവ് ചന്ദ്രശേഖര് തിങ്കളാഴ്ച പറഞ്ഞു.
നിലവില്, മൊബൈല് ഫോണുകളില് രണ്ട് ഓപ്പറേറ്റിംഗ് സിസ്റ്റങ്ങളാണ് ആധിപത്യം പുലര്ത്തുന്നത് - ഗൂഗിളിന്റെ ആന്ഡ്രോയിഡ്, ആപ്പിളിന്റെ ഐഒഎസ്. ഇവ ഹാര്ഡ്വെയര് ഇക്കോസിസ്റ്റത്തെയും മുന്നോട്ട് നയിക്കുന്നതായി മന്ത്രി പിടിഐക്ക് നല്കിയ അഭിമുഖത്തില് പറഞ്ഞു. 'മൂന്നാമത്തേത് എന്ന നിലയിലല്ല, ഒരു പുതിയ ഹാന്ഡ്സെറ്റ് ഓപ്പറേറ്റിംഗ് സിസ്റ്റം സൃഷ്ടിക്കാന് ഇന്ത്യാ ഗവണ്മെന്റിന് വളരെയധികം താല്പ്പര്യമുണ്ട്. ഞങ്ങള് ആളുകളുമായി സംസാരിക്കുകയാണ്. അതിനുള്ള ഒരു നയം ഞങ്ങള് നോക്കുകയാണ്, ചന്ദ്രശേഖര് പറഞ്ഞു.
ഒരു തദ്ദേശീയ ഓപ്പറേറ്റിംഗ് സിസ്റ്റം (ഒഎസ്) വികസിപ്പിക്കുന്നതിന് സ്റ്റാര്ട്ടപ്പ്, അക്കാദമിക് ഇക്കോസിസ്റ്റം എന്നിവയ്ക്കുള്ളിലെ കഴിവുകള് സര്ക്കാര് തേടുകയാണെന്ന് അദ്ദേഹം പറഞ്ഞു. ഒഎസിന്റെ കാര്യക്ഷമമായ പ്രവര്ത്തനത്തിനായി മുഴുവന് ഹാര്ഡ്വെയറിലും സോഫ്റ്റ്വെയര് സിസ്റ്റത്തിലും നെയ്തെടുക്കുന്ന, ഏതൊരു കമ്പ്യൂട്ടറിന്റെയും മൊബൈല് ഉപകരണത്തിന്റെയും പ്രധാന സോഫ്റ്റ്വെയറാണ് ഓപ്പറേറ്റിംഗ് സിസ്റ്റം.
