മുംബൈ: രാജ്യത്തെ ഏറ്റവും വലിയ സ്വകാര്യ ബാങ്കായ ഐസിഐസിഐ ബാങ്ക് 2020 മാര്‍ച്ച് 31 ന് അവസാനിച്ച ത്രൈമാസത്തില്‍ മൊത്ത ലാഭത്തില്‍ 26 ശതമാനം വര്‍ധന രേഖപ്പെടുത്തി. 1,221 കോടി രൂപയായാണ് മൊത്ത ലാഭം. മുന്‍ വര്‍ഷം ബാങ്കിന്റെ അറ്റാദായം 969 കോടി രൂപയായിരുന്നു.
ബ്ലൂംബെര്‍ഗ് പോളില്‍ 16 അനലിസ്റ്റുകള്‍ നടത്തിയ ശരാശരി എസ്റ്റിമേറ്റ് പ്രകാരം 3,510.50 കോടി രൂപയാണ് ബാങ്കിന്റെ അറ്റാദായമായി കണക്കാക്കിയിരുന്നത്. അറ്റ പലിശ വരുമാനം 17 ശതമാനം ഉയര്‍ന്ന് 8,927 കോടിയായി. 2019 മാര്‍ച്ചില്‍ ഇത് 7,620 കോടി രൂപയായിരുന്നു.
നികുതിക്കുശേഷമുള്ള ബാങ്കിന്റെ ലാഭം പ്രതിവര്‍ഷം 136 ശതമാനം വര്‍ധിച്ച് 7,931 കോടി രൂപയായി. 2019 മാര്‍ച്ച് 31 ന് അവസാനിച്ച വര്‍ഷത്തില്‍ ഇത് 3,363 കോടി രൂപയായിരുന്നു. വെള്ളിയാഴ്ച ബിഎസ്ഇയില്‍ ബാങ്കിന്റെ ഓഹരി വില 0.3 ശതമാനം ഇടിഞ്ഞ് 335.65 രൂപയിലെത്തി.
