കശ്മീരില്‍ നിന്നുള്ള ഭക്ഷ്യ-ഭക്ഷ്യേതര ഉല്‍പ്പന്നങ്ങള്‍ യുഎഇയിലും മറ്റ് ഗള്‍ഫ് നാടുകളിലുമെത്തിക്കുന്നതിനായി ലുലു ഗ്രൂപ്പും, ഇന്ത്യന്‍ സ്വകാര്യ വിമാനകമ്പനിയായ ഗോ ഫസ്റ്റ് എയര്‍ലൈനും കൈകോര്‍ക്കുന്നു. ജമ്മു കശ്മീരിലെ ശ്രീനഗറില്‍ നിന്നുള്ള ഉല്‍പ്പന്നങ്ങള്‍ നേരിട്ടു ഷാര്‍ജയിലെത്തിക്കാനാണ് ഇരുവരും ധാരണയായത്. ജമ്മു കശ്മീര്‍ വ്യവസായ- സിവില്‍ ഏവിയേഷന്‍ വകുപ്പ് പ്രിന്‍സിപ്പല്‍ സെക്രട്ടറി രഞ്ജന്‍ താക്കൂറിന്റെ സാന്നിധ്യത്തില്‍ ഗോ ഫസ്റ്റ് മേധാവി മോഹിത് ദ്വിവേദിയും ലുലു ഗ്രൂപ്പ് ഡയറകടര്‍ എംഎ സലിം എന്നിവര്‍ ഇതു സംബന്ധിച്ച ധാരണാപത്രത്തില്‍ ഒപ്പുവച്ചു.
ഗോ ഫസ്റ്റിന്റെ കാശ്മീരില്‍ നിന്നു ഷാര്‍ജയിലേക്കുള്ള ആദ്യ രാജ്യാന്തര യാത്ര സര്‍വീസ് കഴിഞ്ഞയാഴ്ചയാണ് ആഭ്യന്തര മന്ത്രി അമിത് ഷാ ഉദ്ഘാടനം ചെയ്തത്. കശ്മീരില്‍ നിന്ന് ആദ്യമായി അന്താരാഷ്ട്ര കാര്‍ഗോ സര്‍വീസ് ആരംഭിക്കുന്ന ആദ്യ എയര്‍ലൈന്‍ എന്ന ബഹുമതിയും ഗോ ഫസ്റ്റ് ലുലുവുമായുള്ള കരാറോടെ സ്വന്തമാക്കി. പുതിയ കരാറോടെ കശ്മീരിലെ വിശാലമായ കയറ്റുമതി സാധ്യതകള്‍ ഫലപ്രദമായി ഉപയോഗപ്പെടുത്താനാകുമെന്നും, ഇതിനായി അവസരം നല്‍കിയ ജമ്മു കശ്മീര്‍ സര്‍ക്കാരിനും കേന്ദ്ര സര്‍ക്കാരിനും നന്ദി അറിയിക്കുന്നതായും ലുലു ഗ്രൂപ്പ് ഡയറക്ടര്‍ എംഎ സലിം വ്യക്തമാക്കി.
കാശ്മീരില്‍ പ്രാദേശികമായി ഉല്‍പ്പാദിപ്പിക്കുന്ന പഴങ്ങള്‍, പച്ചക്കറികള്‍, കരകൗശല വസ്തുക്കള്‍, മറ്റ് പ്രധാന ഉല്‍പ്പന്നങ്ങള്‍ എന്നിവ കയറ്റുമതി ചെയ്യും. ഡിസംബര്‍ മുതല്‍ സര്‍വീസുകള്‍ ആരംഭിക്കാനാണു ശ്രമിക്കുന്നതെന്നു ഗോ ഫസ്റ്റ് മേധാവി മോഹിത് ദ്വിവേദി വ്യക്തമാക്കി. ജമ്മുകശ്മീര്‍- കേന്ദ്ര സര്‍ക്കാരുകള്‍, ലുലു ഗ്രൂപ്പ് എന്നിവരോടുള്ള നന്ദിയും ഗോ ഫസ്റ്റ് അറിയിച്ചു.
നേരിട്ടുള്ള കാര്‍ഗോ സര്‍വീസ് ആരംഭിക്കുന്നതോടെ ജമ്മു കശ്മീരിലെ കര്‍ഷകര്‍, നെയ്ത്തുകാര്‍, ചെറുകിട സംരംഭകര്‍ എന്നിവര്‍ക്കു വലിയ വിപണന സാധ്യതയാണ് തുറക്കപ്പെടുന്നതെന്നു ജമ്മു കശ്മീര്‍ വ്യവസായ- സിവില്‍ ഏവിയേഷന്‍ വകുപ്പ് പ്രിന്‍സിപ്പല്‍ സെക്രട്ടറി രഞ്ജന്‍ താക്കൂര്‍ പറഞ്ഞു. ലുലുവിന്റെ ഉപഭോക്താക്കള്‍ക്ക് മികച്ച ഉല്‍പ്പന്നങ്ങള്‍ ലഭിക്കുമെന്നതും പദ്ധതിയുടെ സവിശേഷതയാണ്. തുടക്കത്തില്‍ ആഴ്ചയില്‍ നാല് സര്‍വീസുകളാകും ഗോ ഫസ്റ്റ് നടത്തുക. ഭാവിയില്‍ എല്ലാദിവസവും സര്‍വീസ് നടത്തുന്ന രീതിയിലേക്ക് മാറും. നിലവില്‍ കാശമീരില്‍നിന്നു ലുലു ഗ്രൂപ്പ് ആപ്പിള്‍ കയറ്റുമതി ചെയ്യുന്നുണ്ട്.
