കൊച്ചി: മോഡേണ്‍ ബ്രെഡ് നിര്‍മാതാക്കളായ മോഡേണ്‍ ഫുഡ്‌സിനെ ലോകത്തെ ഏറ്റവും പ്രമുഖ ബ്രെഡ് കമ്പനികളിലൊന്നായ ഗ്രൂപ്പോ ബിംബോ ഏറ്റെടുത്തേക്കും. നിലവില്‍ മോഡേണ്‍ ബ്രെഡിന്റെ ഉടമകളായ എവര്‍ സ്റ്റോണുമായി ചര്‍ച്ച നടക്കുന്നു. മെക്‌സിക്കോയിലെ ഏറ്റവും വലിയ ബേക്കറി ഉത്പന്ന കമ്പനിയാണ് ബിംബോ. ഹാര്‍വെസ്റ്റ് ഗോള്‍ഡ് എന്ന ഇന്ത്യന്‍ ബ്രെഡ് കമ്പനിയെ മുന്‍പ് ബിംബോ ഏറ്റെടുത്തിട്ടുണ്ട്.
1965ല്‍ തുടങ്ങിയ പൊതുമേഖലാ സ്ഥാപനമായ മോഡേണ്‍ ബ്രെഡിനെ 2001ല്‍ ഹിന്ദുസ്ഥാന്‍ യൂണിലീവര്‍ വാങ്ങി. യൂണിലീവറിന് മോഡേണ്‍ ബ്രെഡ് നടത്തിക്കൊണ്ടു പോകാനാകാതെ വന്നതോടെ യുണിലീവര്‍ സിംഗപ്പൂര്‍ ആസ്ഥാനമായ എവര്‍‌സ്റ്റോണ്‍ ഗ്രൂപ്പിന്റെ നിമ്മന്‍ ഫുഡ്‌സിന് 2016ല്‍ വിറ്റു. മോഡേണ്‍ ബ്രഡ് പേരു മാറി മോഡേണ്‍ ഫുഡ്‌സ് എന്നായി. കൊച്ചി ഇടപ്പള്ളി ഉള്‍പ്പടെ 6 ഫാക്ടറികളുണ്ട്. വര്‍ഷം 3500 കോടി വില്‍പനയുള്ള ഇന്ത്യന്‍ റൊട്ടി വിപണിയുടെ 45% ഇപ്പോഴും മോഡേണ്‍ ഫുഡ്‌സിനാണ്.
