ഡല്‍ഹിയില്‍ പെട്രോള്‍ വില ലിറ്ററിന് 83 രൂപ മറികടന്നു. ദേശീയ തലസ്ഥാനമായ ഡല്‍ഹിയില്‍ പെട്രോള്‍ വില ഇന്ന് ലിറ്ററിന് 83.13 രൂപയിലെത്തി. രണ്ട് വര്‍ഷത്തിനിടയിലെ ഏറ്റവും ഉയര്‍ന്ന നിരക്കാണിത്. അന്താരാഷ്ട്ര എണ്ണ വിലയിലെ വര്‍ദ്ധനവിനെ തുടര്‍ന്നാണ് ആഭ്യന്തര വിപണിയിലും വില ഉയര്‍ന്നത്. ഇത് കഴിഞ്ഞ രണ്ടാഴ്ചയ്ക്കുള്ളിലെ 13-ാമത്തെ വില വര്‍ദ്ധനവാണ്.
പെട്രോള്‍ വില ശനിയാഴ്ച ലിറ്ററിന് 27 പൈസയും ഡീസല്‍ വില ലിറ്ററിന് 25 പൈസയും ഉയര്‍ന്ന് ഡല്‍ഹിയില്‍ 73.32 രൂപയിലെത്തി. പെട്രോളിന്റെയും ഡീസലിന്റെയും നിലവിലെ വില 2018 സെപ്റ്റംബറിന് ശേഷം ഡല്‍ഹി കണ്ട ഏറ്റവും ഉയര്‍ന്ന നിരക്കാണ്. എണ്ണക്കമ്പനികള്‍ രണ്ട് മാസത്തെ ഇടവേളയ്ക്ക് ശേഷം നവംബര്‍ 20 ന് പ്രതിദിനം ഇന്ധന വില പരിഷ്‌കരണം പുനരാരംഭിച്ചിരുന്നു.
ഡല്‍ഹിയില്‍ പെട്രോള്‍ വില ലിറ്ററിന് 2.07 രൂപയും ഡീസല്‍ നിരക്ക് കഴിഞ്ഞ 16 ദിവസത്തിനിടെ 2.86 രൂപയും ഉയര്‍ന്നു. വാക്‌സിന്‍ പ്രതീക്ഷകള്‍ എണ്ണ വില വര്‍ധിപ്പിക്കുന്നതായി ഐസിഐസിഐ സെക്യൂരിറ്റീസ് അറിയിച്ചു. കൊവിഡ് -19 വാക്‌സിനുകള്‍ ഡിമാന്‍ഡ് വീണ്ടെടുക്കലിന് കാരണമാകുമെന്ന പ്രതീക്ഷയില്‍ 2020 ഒക്ടോബര്‍ അവസാനത്തോടെ ബ്രെന്റ് ക്രൂഡ് ഓയില്‍ ഏറ്റവും താഴ്ന്ന നിലയില്‍ നിന്ന് 34 ശതമാനം ഉയര്‍ന്നു.
യൂറോപ്പിലെയും യുഎസിലെയും കോവിഡിന്റെ രണ്ടാം തരംഗത്തിനിടയിലും ലിബിയന്‍ എണ്ണ ഉല്‍പാദനം പ്രതിദിനം 0.1 ദശലക്ഷം ബാരലില്‍ നിന്ന് (ബിപിഡി) 1.25 ദശലക്ഷം ബിപിഡി ആയി ഉയര്‍ന്നിട്ടും എണ്ണവില കുതിച്ചുയരുകയാണ്. ബ്രെന്റ് ഒക്ടോബര്‍ 30ലെ ബാരലിന് 36.9 യുഎസ് ഡോളറില്‍ നിന്ന് ഡിസംബര്‍ 4 ന് 49.5 ഡോളറായി ഉയര്‍ന്നു.
നവംബര്‍ 20ന് ഇന്ത്യയില്‍ നിരക്ക് വര്‍ദ്ധിക്കാന്‍ തുടങ്ങിയതിന് മുമ്പ് സെപ്റ്റംബര്‍ 22 മുതല്‍ പെട്രോള്‍ വില നിശ്ചലമായിരുന്നു. ഒക്ടോബര്‍ 2 മുതല്‍ ഡീസല്‍ നിരക്കിലും മാറ്റമുണ്ടായിരുന്നില്ല. പൊതുമേഖലാ എണ്ണ വിപണന കമ്പനികളായ ഇന്ത്യന്‍ ഓയില്‍ കോര്‍പ്പറേഷന്‍ (ഐഒസി), ഭാരത് പെട്രോളിയം കോര്‍പ്പറേഷന്‍ ലിമിറ്റഡ് (ബിപിസിഎല്‍), ഹിന്ദുസ്ഥാന്‍ പെട്രോളിയം കോര്‍പ്പറേഷന്‍ ലിമിറ്റഡ് (എച്ച്പിസിഎല്‍) എന്നിവ അന്താരാഷ്ട്ര എണ്ണ വിലയും വിദേശനാണ്യ നിരക്കും അടിസ്ഥാനമാക്കിയാണ് പ്രതിദിനം പെട്രോള്‍, ഡീസല്‍ നിരക്കുകള്‍ പരിഷ്‌കരിക്കുന്നത്.
