കോവിഡ്-19 ഭീതി മൂലം ഏറ്റവും വലിയ പ്രതിസന്ധിയിലേക്ക് നീങ്ങുക വാഹന നിര്‍മ്മാണ കമ്പനികളാകും. രാജ്യം സമ്പൂര്‍ണ ലോക്ക് ഡൗണിലേക്ക് നീങ്ങിത് മൂലം ഏറ്റവും വലിയ പ്രതിസന്ധിയാണ് വാഹന നിര്‍മ്മാണ കമ്പനികള്‍ ഇപ്പോള്‍ അഭിമുഖീകരിക്കുന്നത്. ഉത്പ്പാദനം നിലയ്ക്കുക മാത്രമല്ല, വില്‍പ്പനയില്‍ വരെ ഏറ്റവും വലിയ നഷ്ടം വാഹന നിര്‍മ്മാണ കമ്പനികള്‍ക്കുണ്ടായെന്നാണ് വിലിയുുത്തല്‍. മാര്‍ച്ച് മാസത്തെ വാഹന വില്‍പ്പനയുടെ കണക്കുകള്‍, പകര്‍ച്ചവ്യാധിക്ക് ശേഷമുള്ള ഇന്ത്യയുടെ സാമ്പത്തിക മുന്നേറ്റത്തിന് വലിയ നടപടികള്‍ തന്നെ ആവശ്യമാണെന്നതിന്റെ സൂചനയാണ് നല്‍കുന്നതെന്ന് വിശകലന വിദഗ്ധര്‍ അഭിപ്രായപ്പെടുന്നു.
ഇന്ത്യയിലെ രണ്ട് കാറുകളില്‍ ഒന്ന് വീതം വില്‍ക്കുന്ന മാരുതി മാര്‍ച്ചില്‍ 83,792 യൂണിറ്റുകള്‍ വിറ്റഴിച്ചു. കഴിഞ്ഞ വര്‍ഷത്തെ അപേക്ഷിച്ച് 47 ശതമാനത്തിന്റെ ഇടിവാണ് ഇന്ത്യയിലെ ഏറ്റവും വലിയ കാര്‍ നിര്‍മാതാവിനുണ്ടായത്. മാര്‍ച്ച് 22 മുതല്‍ പ്രവര്‍ത്തനം നിര്‍ത്തിവച്ചതിനാല്‍ ഈ സംഖ്യ 2019 മായി താരതമ്യപ്പെടുത്താനാകില്ലെന്ന് കമ്പനി അറിയിച്ചു.
വാഹന കയറ്റുമതി 55 ശതമാനം ഇടിഞ്ഞ് 4,712 യൂണിറ്റായി. മുന്‍വര്‍ഷം ഇത് 10,463 യൂണിറ്റായിരുന്നു. ആഭ്യന്തര വിപണിയില്‍ ലൈറ്റ് കൊമേഴ്സ്യല്‍ വാഹനങ്ങള്‍ക്ക് 71.5 ശതമാനത്തിന്റെ വന്‍ ഇടിവുണ്ടായി. മാര്‍ച്ചില്‍ ഇത് 736 യൂണിറ്റായി കുറഞ്ഞു. കഴിഞ്ഞ വര്‍ഷം 2,582 യൂണിറ്റുകളായിരുന്ന സ്ഥാനത്താണിത്.
മാരുതി സുസുക്കി അതിന്റെ ജീവനക്കാരുടെയും ബിസിനസ്സ് പങ്കാളികളുടെയും ഉപഭോക്താക്കളുടെയും സുരക്ഷയ്ക്കും ക്ഷേമത്തിനും പ്രതിജ്ഞാബദ്ധമാണ്. കേന്ദ്ര, സംസ്ഥാന തലങ്ങളില്‍ കമ്പനി സര്‍ക്കാരിനെ പിന്തുണയ്ക്കുന്നത് തുടരുമെന്നും കോവിഡ് -19 നെ നേരിടാന്‍ എല്ലാ നിര്‍ദേശങ്ങളും പാലിക്കുമെന്നും കമ്പനി അറിയിച്ചു.
''കോവിഡ് -19 വ്യാപനവും തുടര്‍ന്നുള്ള രാജ്യവ്യാപക ലോക്ക് ഡൗണും വാഹന വില്‍പ്പനയെ ബാധിച്ചു,'' ടാറ്റാ മോട്ടോഴ്സിലെ പാസഞ്ചര്‍ വെഹിക്കിള്‍സ് യൂണിറ്റ് പ്രസിഡന്റ് മയങ്ക് പരീക്ക് പറഞ്ഞു. മാര്‍ച്ചിലെ യാത്രക്കാരുടെ വാഹന വില്‍പ്പന 68 ശതമാനം ഇടിഞ്ഞപ്പോള്‍ ട്രക്കുകള്‍, ബസുകള്‍ ഉള്‍പ്പെടെയുള്ള വാണിജ്യ വാഹനങ്ങളുടെ വില്‍പ്പന 87 ശതമാനം ഇടിഞ്ഞതായി കമ്പനി പറയുന്നു.
